‘ක්ලීන් ශ්රී ලංකා’ ව්යාපෘතිය යටතේ අලුත්වැඩියා කරන ලද පිටකොටුව මධ්යම බස් නැවතුම්පොළේ පිරිසිදුකම සුරැකීම වෙනුවෙන් ශ්රී ලංකා ගුවන් හමුදාව විසින් සුවිශේෂී ප්රායෝගික වැඩපිළිවෙළක් ක්රියාත්මක කර තිබේ. එහිදී සාමාන්යයෙන් සිදුකරන දඩ ගැසීම් හෝ අවවාද කිරීම් වෙනුවට, පරිශ්රය තුළ බුලත් කෙළ ගැසූ සහ අනවසර ස්ථානවල මුත්රා කළ පුද්ගලයින් 1,029 දෙනෙකු අත්අඩංගුවට ගෙන ඔවුන් ලවාම එම අපවිත්ර වූ ස්ථාන පිරිසිදු කරවීම විශේෂත්වයකි. මහජන දේපළ අපවිත්ර කරන්නන්ට එරෙහිව ක්රියාත්මක කළ මෙම නිර්මාණශීලී දඬුවම් ක්රමය බස් මගීන්ගේ මෙන්ම පොදු ජනතාවගේද මහත් ඇගයීමට ලක්ව ඇත.
මෙම මෙහෙයුම සාර්ථක කරගැනීම සඳහා පිටකොටුව බස් නැවතුම්පොළ තුළ පැය 24 පුරා ක්රියාත්මක වන නවීන සීසීටීවී (CCTV) කැමරා නිරීක්ෂණ මෙහෙයුම් මැදිරියක් ගුවන් හමුදාව විසින් ස්ථාපිත කර තිබේ. බස් රථ පිටුපස, අඳුරු මුලු සහ බිත්ති අසල රහසිගතව පරිසරය විනාශ කරන පුද්ගලයින් මෙම කැමරා පද්ධතිය හරහා සූක්ෂමව හඳුනාගැනීමට නිලධාරීහු සමත් වී ඇත. එලෙස හඳුනාගත් වැරදිකරුවන්ට වහාම කොසු, ඉදල්, බුරුසු සහ වතුර බාල්දි ලබාදී ඔවුන් විසින්ම අපවිත්ර කළ බිත්ති සහ බිම් මහල සම්පූර්ණයෙන්ම සෝදා පිරිසිදු කිරීමට සැලැස්වීම සමස්ත සමාජයටම දෙන ලද කදිම ආදර්ශයකි.
රුපියල් මිලියන ගණනක රජයේ ප්රතිපාදන යොදවා ජනතා අයිතියට පැවරූ මෙවැනි පොදු දේපළ සුරක්ෂිතව තබාගැනීම සෑම පුරවැසියෙකුගේම පරම වගකීමකි. නැවතුම්පොළ තුළ විශේෂ කුණු කූඩ සහ නවීන සනීපාරක්ෂක පහසුකම් ස්ථාපිත කර ඇති බැවින් ඒවා නිසි ලෙස භාවිතා කිරීමට මහජනතාව පෙළඹිය යුතු අතර, ශ්රී ලංකාවේ පොදු ස්ථානවල විනය සහ පිරිසිදුකම පවත්වා ගැනීම වෙනුවෙන් මෙවැනි හදිසි වැටලීම් ඉදිරියටත් අඛණ්ඩව ක්රියාත්මක කිරීමට බලධාරීන් තීරණය කර ඇත.
Local
පිටකොටුව බස් නැවතුම්පොළ අපවිත්ර කළ 1,029 දෙනෙකු ලවාම එම ස්ථාන පිරිසිදු කරවීමේ විශේෂ මෙහෙයුමක්
25
Aug
Aug
