නුවරඑළිය ‘සුදු අලින්ගේ’ බිම් කොල්ලය: බලයේ හයියෙන් මහජන ඉඩම් ගිලගත් දේශපාලන මාෆියාවේ හෙළිදරව්ව
ශ්රී ලංකාවේ පාරිසරික සහ ආර්ථික හදවත බඳු වූ නුවරඑළිය කඳුකරයේ අතිශය වටිනා රාජ්ය ඉඩම්, දේශපාලන අධිකාරිය සහ නිලධාරිවාදය එක්ව සිදුකළ මහා පරිමාණ සංවිධානාත්මක කොල්ලයකට ගොදුරු වී ඇති ආකාරය පිළිබඳ තොරතුරු මේ වන විට දිගහැරෙමින් පවතියි. කෘෂිකාර්මික හා වාරිමාර්ග ක්ෂේත්රයේ ප්රවර්ධනය වෙනුවෙන් මහජන භාණ්ඩාගාරයේ මුදලින් නඩත්තු වූ මෙම අක්කර සිය ගණනක භූමි භාගයන්, පසුගිය කාලය මුළුල්ලේ පාලකයන් විසින් තමන්ගේ සහ තම හිතවතුන්ගේ පෞද්ගලික බූදලයක් බවට පත්කරගෙන තිබූ බවට බරපතළ විමර්ශන සාක්ෂි මතුවෙමින් තිබේ.
කෘෂිකර්ම, පශු සම්පත්, ඉඩම් සහ වාරිමාර්ග අමාත්යාංශය මඟින් ආරම්භ කර ඇති විශේෂ විමර්ශනය හරහා හෙළිදරව් වී ඇති ප්රධාන ඉඩම් ගනුදෙනු කිහිපයක් හඳුනාගෙන ඇත. ඒ අනුව කොත්මලේ, ෆ්රෝටොෆ්ට් (Frotoft) වත්තේ අක්කර 16ක ප්රමුඛ කඳුකර ඉඩම හිටපු පාර්ලිමේන්තු මන්ත්රී සදාසිවම් වෙත පවරා ඇති අතර, වැවල්පලාව (Wewalpalawa) ඉඩම් සංකීර්ණයේ අක්කර 50ක දැවැන්ත ඉඩම් කොටස හිටපු පාර්ලිමේන්තු මන්ත්රී වඩිවේල් සුරේෂ්ගේ නමට බැඳී ඇති බවට සැකකෙරේ. එමෙන්ම ජාතික පශු සම්පත් මණ්ඩලයේ (NLDB) හිටපු සභාපති උපාලි ලියනගේ නිල කාලය තුළ නීත්යානුකූල නොවන අයුරින් අභිමතය පරිදි තවත් අක්කර 50ක මහා භූමියක් බෙදාදුන් බවට චෝදනා එල්ල වන අතර, තලවකැලේ උපායමාර්ගික කලාපයෙන් අක්කර 50කට ආසන්න ඉඩම් ප්රමාණයක් හිටපු දේශපාලනඥ රංජිත් සියඹලාපිටිය වෙත ලැබී ඇති බව සඳහන් වේ. තවද මාගස්තොට (Magasthota) සංචාරක ඉසව්වේ අක්කර 20ක ඉඩම් කලාපයක් හිටපු අමාත්ය මහින්දානන්ද අලුත්ගමගේගේ පාලනයට යටත්ව තිබෙන බවටද හෙළිදරව් වී ඇත.
රටේ සාමාන්ය ගොවියකුට හෝ පුරවැසියකුට වගා කටයුත්තක් සඳහා පර්චස් විස්සක් වෙන්කරවා ගැනීමට රජයේ කාර්යාල ගණනාවකට රස්තියාදු වීමට සිදුව තිබියදී, බලය අතැති මෙම කණ්ඩායමට මෙතරම් වටිනා බිම් අක්කර පනහ බැගින් බෙදාගැනීමට දොර විවර වූයේ කුමන නීතිමය පදනමකින්ද යන්න බරපතළ ගැටලුවකි. HariDeshayaLk සිදුකරන විමර්ශනයට අනුව, මෙම ඉඩම් ජාවාරම සිදුව ඇත්තේ හුදෙක් සරල ලියකියවිලි දෝෂයකින් නොව ඉතා සූක්ෂ්ම ක්රමවේද ඔස්සේ ය. එහිදී වර්තමාන වෙළෙඳපොළ වටිනාකම් මුළුමනින්ම නොසලකා හරිමින්, දශක ගණනාවකට පෙර පැවති සොච්චම් තක්සේරු ගාස්තු පදනම් කරගනිමින් වසර 30ක දීර්ඝකාලීන බදු පදනම යටතේ මේවා ලබාදී තිබේ. එසේම ආයෝජන, කෘෂිකර්මාන්තය හෝ පශු සම්පත් සංවර්ධනය නාමයෙන් ව්යාජ හෝ දුර්වල ශක්යතා වාර්තා ඉදිරිපත් කර ලබාගත් මෙම ඉඩම් බොහොමයක් පසුව වාණිජ හෝ පෞද්ගලික පරිහරණයට යොදාගෙන ඇත. තවද විවෘත ටෙන්ඩර් කැඳවීමක් හෝ පාරදෘශ්ය ලංසු තැබීමක් නොමැතිව, ඉහළ දේශපාලන බලපෑම් සහ බලධාරීන්ගේ තනි අභිමතය පරිදි ලිපිගොනු අනුමත කරමින් තරගකාරී ප්රසම්පාදන ක්රියාවලිය මුළුමනින්ම මඟහැර තිබේ.
රජයේ ඉඩම් යනු දේශපාලකයන්ගේ හෝ පක්ෂ හිතවතුන්ගේ පෞද්ගලික දේපළක් නොවන අතර, ඉඩම් කොමසාරිස් ජනරාල් දෙපාර්තමේන්තුවේ මූලික වගකීම වන්නේ රාජ්ය ඉඩම් ආරක්ෂා කරමින් ඒවා උපරිම ආර්ථික ඵලදායිතාවක් සහිතව මහජන යහපතට යෙදවීමයි. මෙම පසුබිම තුළ ආණ්ඩුව පත්කළ 11 දෙනෙකුගෙන් යුත් විශේෂඥ කමිටුවේ වාර්තා ලාච්චුවල දමා වැසීමට ඉඩ නොදී වහාම ක්රියාත්මක විය යුතුය. නීතිවිරෝධී, අක්රමවත් සහ අවතක්සේරු කර ලබාදී ඇති සියලුම බදු ගිවිසුම් කඩිනමින් අවලංගු කර, ඉඩම් සම්පූර්ණයෙන්ම යළි රජයට පවරා ගත යුතු අතර, සැබෑ වෙළෙඳපොළ වටිනාකම අනුව පසුගිය කාලය සඳහා අයවිය යුතු බදු හා දඩ මුදල් අදාළ පුද්ගලයන්ගේ පුද්ගලික වත්කම්වලින් අයකර ගත යුතුය. එසේම බලය අයුතු ලෙස භාවිත කරමින් මහජන දේපළ අවභාවිතයට ඉඩ සැලසූ නිලධාරීන්ට සහ ඒවා භුක්ති විඳින දේශපාලනඥයන්ට එරෙහිව දූෂණ විරෝධී පනත යටතේ අපරාධ නීතිය මඟින් අධිකරණමය ක්රියාමාර්ග ගැනීම අත්යවශ්ය වේ. නුවරඑළියේ අක්කර සිය ගණනක මහජන බිම් කොල්ලය යනු වර්තමාන පාලන තන්ත්රයේ නීතියේ ආධිපත්යය මැනෙන සැබෑ උරගල වන අතර, විමර්ශන ලිපිගොනු තුළින් දූෂිතයන් බේරාගැනීමට දරන ඕනෑම උත්සාහයක් ජනතා අධිකරණය හමුවේ පරාජය කළ යුතුය.
Hari deshaya ලිපිය ඇසුරිනි
