Kinsberry හෝටලය අවුරුද්දට ලක්ෂ 20 ගානේ අවුරුදු 30 බදු දීමේ ජාවාරමකට සැරසෙනවාද?

ශ්‍රී ලංකා රජයට අයත් කොළඹ නගර මධ්‍යයේ පිහිටි අතිශය වටිනා “කිංග්ස්බරි” (The Kingsbury) හෝටල් භූමිය දීර්ඝකාලීන බදු ඔප්පුවකින් ව්‍යාපාරික ධම්මික පෙරේරා මහතා වෙත පැවරීමේ අතිදැවැන්ත මූල්‍ය වංචාවක සහ දූෂිත දේශපාලන කුමන්ත්‍රණයක තොරතුරු සමාජ මාධ්‍ය ක්‍රියාකාරී සචින් රත්වත්තේ විසින් අනාවරණය කර තිබේ. ඔහුගේ අනාවරණයට අනුව, කොළඹ වාණිජ නගරයේ හදවත බඳු ප්‍රදේශයක පිහිටි අක්කර පහහමාරක (පර්චස් 880ක) අතිදැවැන්ත භූමි භාගයක් මෙලෙස පෞද්ගලික අංශය වෙත පැවරීමට සැලසුම් කර ඇති අතර, ඒ සඳහා නියම කර ඇති වාර්ෂික රාජ්‍ය කුලී පිරිවැය රුපියල් ලක්ෂ විස්සක් වැනි අතිශය හාස්‍යජනක අවම මුදලකි. මේ අනුව, එම ඉඩම වෙනුවෙන් මසකට අය කෙරෙන කුලිය රුපියල් එක්ලක්ෂ හැට දහසක් පමණ වන අතර, වත්මන් ආර්ථික වටපිටාව යටතේ කොළඹ නගරයෙන් සාමාන්‍ය නිවාස සංකීර්ණ කාමරයක් කුලියට ගැනීමටවත් නොහැකි මෙවැනි අවම මුදලකට අක්කර පහක රාජ්‍ය දේපළක් වසර 30ක කාලයකට මෙලෙස පවරා දීම බරපතල අපරාධයකි.
මෙම ඉඩම සඳහා නියම කර ඇති සැබෑ වාර්ෂික කුලී තක්සේරුව රු. මිලියන 385ක් වුව ද, දේශපාලන බලපෑම් මත එය වසරකට රුපියල් ලක්ෂ 20ත් ලක්ෂ 50ත් අතර මුදලකට ධම්මික පෙරේරා වෙත ලබාදීමට සියලු කටයුතු සූදානම් කර ඇති බව පැවසේ. මෙමඟින් ව්‍යාපාරික ධම්මික පෙරේරාට වසරකට පමණක් රුපියල් මිලියන 380ක අයුතු ලාභයක් හිමිවන අතර, වසර 30ක සමස්ත බදු කාලය තුළදී ඉන් උපයන ශුද්ධ ලාභය රුපියල් කෝටි 1,140ක් (බිලියන 11.4ක්) දක්වා අතිදැවැන්ත වේ. මෙම දූෂිත ගනුදෙනුවේ තවත් විශේෂත්වයක් වන්නේ, කිංග්ස්බරි හෝටලයට අයත් අක්කර දෙකහමාරක (පර්චස් 400ක) රථ ගාල පමණක් වෙන් කර, එය කොළඹ වරාය නගරය (Port City) වෙත නැවත උප-කුලී පදනම මත පවරා රුපියල් බිලියන ගණනක mහා පරිමාණ ජාත්‍යන්තර ව්‍යාපාරික ජාවාරමක් දියත් කිරීමට ද ධම්මික පෙරේරා පාර්ශවය මේ වන විට සැලසුම් සකස් කරමින් සිටීම බව සචින් රත්වත්තේ සිය ෆේස්බුක් සටහනෙන් පෙන්වා දෙයි.
මෙතරම් විශාල වංචාවක් සිදුවෙද්දී, අවම වශයෙන් රජයට ගෙවිය යුතු නීත්‍යානුකූල බදු මුදල් පවා ධම්මික පෙරේරා විසින් මෙතෙක් ගෙවා නොමැති බව හෙළිවේ. කෙසේ වුවද, මෙම කිංග්ස්බරි ඉඩමේ කුලී ගෙවීම් පිළිබඳ අවසන් තීරණය ගැනීම සඳහා වන රජයේ විශේෂ කමිටුව ලබන සතියේදී නිල වශයෙන් ස්ථාපිත කිරීමට නියමිත අතර, එහි අවසන් තීරණය මෙම ජුනි මාසය ඇතුළතදීම ලබාගැනීමට නියමිතය. කෙසේ වෙතත්, සමාජ මාධ්‍ය ඔස්සේ එල්ල වන මෙම බරපතල චෝදනා සම්බන්ධයෙන් වගකිවයුතු රාජ්‍ය ආයතන හෝ අදාළ ව්‍යාපාරික පාර්ශවයන් මෙතෙක් නිල ප්‍රකාශයක් නිකුත් කර නොමැති අතර, ඉදිරි සතියේ රැස්වන විශේෂ කමිටු තීරණයත් සමඟ මෙම ගනුදෙනුවේ නීත්‍යානුකූල සහ සත්‍ය තත්ත්වය රටට හෙළිවනු ඇතැයි අපේක්ෂා කෙරේ.